Бл. єпископ Теодор РОМЖА

[незломна сила віруючіх]

 

Блаженый ґрекокатолицькый єпископ Теодор Ромжа ся народив 11.4.1911 в родині желізнічаря в селі Надьбочко (теперь Великый Бычків) на Підкарпатю. В родині быв девятым дітиском. Родиче выховували свої діти в хрістияньскім духу. Основну школу выходив в ріднім селі. В році 1930 закінчів штудії матурітов на ґімназії в Хусті. Теодор быв все веселый, любив шпорт, рад чітав жывоты святых і мучеників. Тогдышній мукачовскый єпископ Петро Ґебей ёго прияв до священицького семінаря в Ужгороді а кідь відів, якы мать таленты і характер, післав го докінчіти теолоґічны штудії до папського колеґія Ґерманікум-Гунґарікум, в 1934 Русікум в Рімі. Філозофію і теолоґію скінчів на папській универзіті Ґреґоріанум, де здобыв і докторскый тітул. В Рімі быв 25.12.1936 рукоположеный на священика. Ёго священицкым моттом были слова 116 псалму: -Господи, єм твій слуга і сын твоёй служебниці. В році 1937 быв менованый за пароха в Березовім. Новій єпископ Александер Стойка ёго пізніше закликав до Уждороду і выменовав за шпірітуала свячщеницького семінаря і професора філозофії. По смерти єпископа А. Стойку прияв 24.9.1944 єпископску хіротонію на єпископа мукачовской єпархії, котру вів лем три рокы. На єпископа Ромжу зробили 27.10.1947 атентат. Тяжкым воєнскым мотором вдарили до воза, в котрім ся віз єпископ і другы священиці. Віз ся розпав а отрясеных священиків бы бандиты добили на смерть, кебы не пришлов поштарьскый мотор з єдной і віруючі з другой страны. Пак іх одвезли до шпыталя до Мукачова. Єпископ ся уж діставав із тяжкой раны, як го 31.10. 1947 отровила сестра Одарка, котру післало НКВД. Вмерти мусив прото, бо быв могучов силов, котра тримала віруючіх вєдно і не піддавала ся неприятелёві Хрістовой церкві. Ёго жывот быв як ікона Хріста. Насдідовав Ісуса, ріс в мудрости, вчів словами і прикладом, обяв вшыткых і вшытко із любовёв. В переслідуваню быв силный і прияв свій хрест – смерь про віру і про церков. Свою душу оддал Сотворителёві в шпыталю як мученик 1.11.1947.В 60-тых роках 20-го сторіча інавґурованём метрополитного архієпископа візантійскорусиньской метропо лії Ш. Й. Кочішка ся почав процес беатифікації єпископа Т. Ромжу і ёго сполубратів, Павла Петра Ґойдіча, Васіля Гопка і Александра Хіру. За благославеного Ромжу выголосив 27.6.2001 папа Йоан Павел ІІ.

This entry was posted in Cerkov. Bookmark the permalink.

Comments are closed.